شوفوا
يا جماعة اللى يظن ان الناس مغفلين ومش فاهمين حاجه يبقى هو اللى مغفل ..
واللى يظن انه ممكن يلعب على كل الالوان يبقى يبقى نايم فى بير عميق ..
أنا بصراحة مش عارفه ليه كل ما افتح جرنال( الدستور) وألاقى الراجل ده
بيكتب فى اخر صفحة بتنرفز خصوصا لما يعمل فيها ابو الوطنية .. أنا حقيقى
مش عارفه هو ممكن يعيش الانسان بوشين ؟ ولا هى المبادى بتتجرأ ؟ ولا هو
السوق اللى عاوز كده ؟ ولا هى موضة انى أعارض و خلاص وأبقى وطنى على اساس
يعنى أن كل معارض للحكومة بقى مصطفى كامل أو محمد فريد ..وكلنا طبعا نقدر
نفرق بين المعارض اللى بجد مفيش حاجه بتهمه غير مصلحة البلد وبين اللى
بيعمل فيها معارض تأدية دور.. زى الاعلامي الشهير ده اللى سايق فيها دور
المعارضة على اساس انها موضه ، وأصلا مراته فى الحزب الوطنى واخده مكانتها
فيه كمان .. نرجع للراجل بتاع ( الدستور) وانا اعترف ان كتاباته الساخرة
حلوه وممكن تضحكك كمان لكن عاوزه اقوله معلش لو قلتلك طز فى كتابات حضرتك
، أصل مش ممكن تعمل لنا فيها وطني وهمك مصلحة البلد وانت خاربها فى
السينما وبتدمر عقول الالوف من الشباب .. الراجل ده يا جماعة هو مؤلف
أفلام ( حاحا وتفاحه) و(سيد العاطفى) و( عودة الندلة) و( صايع بحر ) و(
خالتى فرنسا) .. واللى شاف فيلم ( حاحا وتفاحه ) حيلاقى منتهى السفالة
وتلميحات جنسية قذرة .. طب واحد كاتب كلام زى ده انا ازاى لما افتح
الجرنال ولاقيه بيتكلم عن فساد الحزب الوطنى ازاى اصدق ان الراجل ده عاوز
مصلحة البلد .. ومن خلال قرائتى لاكتر من حوار مع الراجل ده اتضح ليا ان
تقييمه للفن عموما من خلال التذكرة اللى بيدفعها المغفل على شباك التذاكر
.. فى نظره فيلم نجح جماهيرا خلاص هو ده الفن علشان احنا بنقدم ما يطلبه
المشاهدون ..مع انى ضد حكاية ان الجمهور عاوز كده ، لانه مش معقول انك
تفسد ذوق الناس وتقول الجمهور عاوز كده او انك تستغل الكبت والقهر اللى
الناس عايشاه وحاجتهم للترويح عن نفسهم وتقدملهم الاسفاف ده على اساس انه
فن .. مهى افلام ( إسماعيل يس) بتتذاع لغاية دلوقت وبنتفرج عليها وبنضحك
من قلوبنا ومش بنزهق منها ..لكن مفيهاش اى قلة ادب او قاحه ..رغم ان افلام
( إسماعيل يس) مش بتقدم أى هدف غير الضحك بس هو ضحك جميل مش مرتبط
بتلميحات جنسية أو إستخفاف أو إستظراف زى اللى بيعمله المحروس .. ولما يتم
تقديم افلام لها قيمة ..الناس بتقبل عليها .. يبقى الظارهة الموجودة
دلوقتى دى أنا بقول السبب فى صنعها وصنع الراجل ده هو الجمهور .. يا جماعة
لو نقاطع الافلام دى مش حيطلع حد زى ده يكون ملايين من دم الشعب ، انت
بتروح تدفع تذكرة ( 10) جنية إلى (25) جنيه علشان أمثال الراجل ده يطلعوا
فوق .. فى نفس الوقت فيه ناس مش لاقية ربع جنية علشان تفطر به .. وانت
تدفع التذكرة بطيب خاطر وعمرك ما فكرت انك تتبرع ولو بجنيه .. طبعا مش
للشحاتين فى الشوارع علشان اصبحت الشحاتة دلوقت مهنة وعصابات ولكن للجامع
أو ناس جنبك عافر انهم محتاجين .. وفى الاخر حنحاسب على الفلوس دى ..
خلينا بقه نكون صرحة .. أنت راضى عن نفسك ؟!