تزاحم بالضمير هموم وقلبٍ حايرٍ مكسـور
ولا ينفع بالقلب المنكسـر كثـرة جبايرهـا
تلاطم بالضلوع العوج موج عاتيٍ وبحـور
ولا من مركبٍ وشراع يامن ثـار ثايرهـا
انا مالي بهالدنيا سوى قلب وقلم وسطـور
صديقٍ صادقٍ ياقف إليـا صكـت معابرهـا
وإليا ضاعوا بلايها حياة من نكـد وعثـور
انا مطرودها ملحوق من كثـرة عثايرهـا
انا قلبي دليلي في زمـان مدبـر مسعـور
كبير مايهمه لـو تحـاول بـه صغايرهـا
المم بالقلم اشتات روحي في ورق مسطور
وانثر كل معنى في ضمير اللـي يناظرهـا
لي احساسٍ يصورنا يحوم بداخلـي ويثـور
صدوقٍ واعذب الأشعار ماتصدق مشاعرها
صديقي صعبٍ اختاره بعالـم بالألـم يمـور
حسود وجاهل وراعي مصالح مع مكابرهـا
ياكثر اللي تضحك لي وقلبه بالمرض مغمور
على وجه يبين اللي يخفي فـي سرايرهـا
صديق مأمني ياقف معي بالخير ولا شرور
ولا يبيع الذي بيني وبيـن فعـل غادرهـا
ولا ينسى ليالينا ولا هو جاحـد ومغـرور
مواقفنـا القديمـه دايـم بالخيـر باكرهـا
ياليت الروح بحمول المصايب والعذاب يثور
دخيلك شيلهايامـال ويـن اللـي يثورهـا
عنينا من عنى الدنيا متاهات وشقى ودهور
ولو ان الجبـال تشيلهـا ماظـن تقدرهـا
اذا بظفرك طرفت العين لاتدور على دكتـور
ترى ماتحرق النيران غير اللـي يجاورهـا
لو الدنيا على كيفي اسوقه ولو تجي بعسور
ولكن ماعلى كيفه نغامـر فـي مخاطرهـا
انا وقتي غدر بي مالي حظ بالزمن عبـور
سنين يقطعه ماقسـاه ماترحـم مسافرهـا
ناس كنها تقضي حياته فـي وسـط تنـور
وناس مـادرت عنـه ولا ذاقـت مرايرهـا
انا كلي عذر واللي شكى من هالزمن معذور
وانا ادري جرح روحي زاد من كثرة تعذرها
تسنعنا السعاده يوم صرنا في فرح وسرور
نحاول نخفـي العلـه وتفضحنـا عبايرهـا
على الله كل شيء يسير وايام الزمن تـدور
متى تضحك لنا الدنيا عقب ماشان ناظرهـا
/
/
/
/
للأستاذ :: عبدالرحمن الغييثي ..!!!
::
اتمنى تنال اعجابكمـ ورضاكمـ
الخميس نوفمبر 15, 2007 12:22 am