:
قرأت نصيحة من أحد الأعضاء لي..
ينصحني بالأمر بالمعروف والنهي عن المنكر..
:
بصراحة استوقفتي نصيحته كثير..
تأملتها البارحة.. ليش فعلا ما أمر بالمعروف وأنهى عن المنكر..
بعد تفكير وجدت أن الساحة ولله الحمد مليئة بالوعاظ..
في المسجد .. في الصحف.. في القنوات الفضائية..
في كل مكان حتى في الأعراس في مجالسنا.. في بيوتنا..
وفي نفس الوقت وجدت نفسي ما املك مقومات الواعظ..
بس ممكن أعظ بنقل تجربة.. وبالتأكيد التجارب تصل للقلوب أكثر..
:
قررت أعظ.. بطريقتي..
بنقل لكم تجربة شخصية يمكن تستفيدووووون منها..
الجميع أحيانا يمر عليه لحظات ضيقة صدر..
وتلقاه كاره نفسه ومو طايق الدنيا واللي حوله..
:
مرة طلعت من الشغل..
الكلام ذا من سنتين..
كنت كاره نفسي..
مدري وش فيني أحس بضيقة صدر غريبة..
وعبرة تحرق حلقي..
ودمعه أحاول قهرها..
:
رحت للبيت.. ما حسيت بنفسي..
صحيت في الليل لقيت أخواني وأمي وأبوي وكل العيلة عندي في الغرفة..
قالو انت سويت بلاوي.. صياح ونياح وقلة حياء..
أكثر واحد كان حاس فيني أمي..
أمي مؤمنة بالعين مرة.. وكل شي تقول عين.. <<<<<<<<< أنا مدري العين وش تبي فيني..
المهم أقنعتني أن اللي فيني عين..
وطلبت مني اروح لشيخ يقرأ علي..
:
رحت لداعية سعودي تربطني فيه علاقة..
صليت معه العشاء.. وقلطت عنده في البيت..
قلت له السالفة..
قرأ علي.. وقال يأبو وضعك خطير..
قلت وشفيني.. قال فيك عين قوية..
وسحر شاربه وماكله وشامه.. واستطرد (وهذا أقوى سحر في الوجود)..
قلت تكفى يا شيخ دبرني.. أنا توي صغير وأمي لسا تترجاني..
:
المهم الداعية (الله يوفقه دنيا وأخره).. قال العلاج يبدأ حبة حبة..
قلت شلون..
قال في البداية أبيك تصلي كل الصلوات في المسجد لمدة 40 يوم..
وأبيك ما تفوتك الإقامة ولا صلاة.. وإذا فاتتك ابيك تعيد الأربعين يوم من جديد..
وثانيا لا تنام الا على صوت قارئ للقرآن.. أو تنام وأنت حاط إذاعة القرآن عند رأسك..
وبعدين تجيني أعطيك الوصفة الثانية..
وحذرني قبل أمشي قال يا سـ........... أبيك تلتزم في العلاج لأن وضعك خطير..
:
رحت للبيت وسويت اللي طلبه مني بحذافيره..
مع مرور الوقت حسيت أن ضيقة الصدر بدت تخف..
وحسيت براحة نفسية عجيبة..
وبعد ما انهيت الوصفة الأولى..
رحت له في البيت وقلت له أنهيت العلاج يالله عطني الوصفة الثانية..
قال كيف وضعك.. قلت تمام.. قال ما تحس بشيء..
قلت ولا أحس بأي شي.. بس ألحقني بالوصفة الثانية قبل يروح مفعول العلاج وأرجع زي أول..
جلس يضحك.. وقال يأبو ما فيك لا عين ولا سحر ولا يحزنون..
اللي فيك بعد عن الله سبحانة وتعالى..
علاجك القرب من الله.. والمداومة على الصلاة وسماع القرآن..
:
عاد وش أسوي صرت واعظ على قدي..
سامحوني إذا خبصت وإلا ما عرفت أنصح...
على العموم هي تجربة شخصية ونقلتها لكم بعفوية..
إن شاء الله تستفيدون منها.. أنا بالتأكيد كانت تجربة جميلة واستفدت منها..
:
الجمعة ديسمبر 07, 2007 7:03 am
